Եկեղեցու կանանց կազմակերպության նախագահը ելույթ է ունենում ԵՄ խորհրդարանում

Քույր Քամիլ Ն. Ջոնսոնը՝ Հիսուս Քրիստոսի Վերջին Օրերի Սրբերի Եկեղեցու Սփոփող միության գերագույն նախագահը, ելույթ ունեցավ Եվրոպական խորհրդարանում 2024 թվականի մարտի 4-ին Բրյուսելում՝ ելույթ ունենալով քաղաքացիական հասարակության կազմակերպությունների, եկեղեցիների և կրոնական կազմակերպությունների ներկայացուցիչների հավաքի ժամանակ։ Նա ելույթ ունեցավ «Հզորացնել կանանց ազատությունը կրոնի և հավատքի ոլորտներում» թեմայով և կիսվեց իր անձնական փորձով ու պատկերացումներով այն մասին, թե հավատավոր կանայք ինչպես կարող են նպաստել ավելի արդար և ներառական հասարակության կառուցմանը:

{{տեղադրել տեսանյութը - https://youtube.com/embed/C3rzrRZBUpI?si=rcfUxRN4JkdiyxX5 }}

Միջոցառումը վարում էր Եվրոպայի խորհրդարանի անդամ տիկին Անյա Հագան՝ Բրյուսելի ԵՄ և Եկեղեցու միջազգային հարաբերությունների գրասենյակի հետ համագործակցությամբ: Զեկույցներն ընդգրկում էին կրոնի և հավատքի ազատության շուրջ տարբեր տեսակետներ և ներառում էին երկու խմբային քննարկումներ, որտեղ մասնակիցները կիսվում էին անձնական պատմություններով: Միջոցառումը համընկել էր Կանանց միջազգային օրվա հետ, որը նշվում է ամեն տարի մարտի 8-ին՝ կանանց ձեռքբերումներն ու մարտահրավերները ճանաչելի դարձնելու ողջ աշխարհի համար:

Քույր Ջոնսոնը սկսեց իր ելույթը՝ հայտարարելով հասարակության մեջ կանանց ունեցած եզակի դերի մասին՝ որպես շնորհալի առաջնորդներ, ուսուցիչներ, սնուցողներ, բժշկողներ և խաղաղարարներ: Եթե կրոնի կամ հավատքի ազատությունը պաշտպանված չէ, այդ դերն ամբողջությամբ չի կատարվում:

«Հասարակագետները ցույց են տվել, որ երբ հասարակությունները և կառավարությունները սահմանափակում են կրոնական ազատությունները, սոցիալական հակամարտությունն ավելանում է: Նման հակամարտությունը և դրանից բխող բռնությունը միշտ վնասում են ամենախոցելի խավերին՝ ներառյալ կանանց և երեխաներին: Այն ապակայունացնում է տնտեսությունները և տնային տնտեսությունները: Այն մեծացնում է անհավասարությունը, ներառյալ գենդերային անհավասարությունը: Եվ դա խանգարում է կանանց օգտագործել իրենց բնածին շնորհները՝ խաղաղություն զարգացնելու համար»,- ասաց նա:

Նա նշեց, որ եթե սովորական կանայք պետք է կատարեն իրենց յուրահատուկ ամենօրյա խաղաղարարի դերը, նրանք իրենք պետք է ոգեշնչվեն, սնվեն, բժշկվեն, զորացվեն և ուսուցանվեն իրենց աստվածային ներուժի մասին: Կանայք «պետք է կարողանան ապրել իրենց բարձրագույն ձգտումների և արժեքների համաձայն, նաև կարողանան հավաքվել, կիսվել և կազմակերպվել՝ փոխադարձ աջակցության համար: Իհարկե, սա այն է, ինչ տալիս է կրոնի և հավատքի ամուր և անխախտ ազատությունը: Այն երաշխավորում է կանանց, տղամարդկանց և երեխաներին, որ նրանք կարող են ապրել բարեխիղճ բարոյական կյանքով՝ հավատակիցների փոխադարձ աջակցությամբ, միաժամանակ նույն արժանապատվությունը տալով իրենց հարևաններին ու մերձավորներին»,- հայտարարեց նա:

Առաջին խմբային քննարկումը նվիրված էր ամբողջ աշխարհի կանանց ճկունությանն ու դիմադրողականությանը և նրանց պատմություններին, երբ նրանք հետամուտ են լինում կրոնի և հավատքի ազատությանը: Խոսնակների թվում էին Բահայի միջազգային համայնքը ներկայացնող Ռեյչել Բայանին, Գենդերային և կրոնական ազատությունների պաշտպանության պատասխանատու Հելեն Ֆիշերը և «Open Doors International» կազմակերպության ներկայացուցիչ Անաստասիա Հարթմանը:

Երկրորդ խմբային քննարկումը կենտրոնացած էր կրոնի կամ հավատքիի ազատության համատեքստում կանանց իրավունքների խթանման ռազմավարությունների և լուծումների ներկայացման վրա: Ժնևում կանանց կարգավիճակի հարցերով ՀԿ-ի նախագահ Քերոլին Հանդշինը ներկայացրեց ՄԱԿ-ի շրջանակներում քաղաքացիական հասարակության կազմակերպությունների ներդրման պատկերացումները: ԵԱՀԿ-ի Ժողովրդավարական հաստատությունների և մարդու իրավունքների գրասենյակի հավատքի ազատության հարցերով ավագ խորհրդական Սյուզան Քերը խոսեց կրոնական ազատության գործադրման հարցում անվտանգության բաղադրիչի կարևորության մասին:

Ֆրանչեսկո Դի Լիլոն՝ Եկեղեցու ԵՄ և միջազգային հարաբերությունների գրասենյակի տնօրենը Բրյուսելում, որը վարում էր խմբային քննարկումը, հուսով է, որ «այս միջոցառումը կխթանի ավելի շատ երկխոսություն և համագործակցություն կրոնական և քաղաքական առաջնորդների, ինչպես նաև քաղաքացիական հասարակության միջև՝ խթանելու և պաշտպանելու կանանց կրոնական ազատությունը ողջ աշխարհում»:

Միջոցառման վարող տիկին Անյա Հագան եզրափակելով ասաց, որ «եթե մենք խաղաղություն ենք ուզում, մենք պետք է պաշտպանենք կրոնական ազատությունը: Եվ դուք պետք է պայքարեք կանանց կրոնական ազատության համար: Այդպես եք դուք խաղաղություն հաստատում աշխարհում»:

Օրն ավարտվեց կին դեսպանների և քաղաքացիական հասարակության կազմակերպությունների ղեկավարների հետ ընթրիքով՝ խորացնելով երկխոսությունը կրոնական ազատության հեռանկարների և այն մասին, թե այս հիմնարար իրավունքը ինչպես կարող է հանգեցնել ավելի արդար հասարակությունների:

Քույր Ջոնսոնը նաև հանդիպեց Եկեղեցու անդամներին Բրյուսելում՝ կանանց հատուկ հոգևոր հավաքի ժամանակ: Ավելի ուշ նա մասնակցեց Եկեղեցու միսիոներների հետ հանդիպմանը, որոնք ծառայում են Բելգիա Նիդեռլանդներ միսիայում: Այն տեղի ունեցավ Եկեղեցու նոր հավաքատանը Նիդեռլանդների Բրեդա քաղաքում: