Անցյալ տարի The Tabernacle Choir at Temple Square մեկնարկեց իրենց շարքերում միջազգային երգիչներ ընդգրկելու ծրագիրը: Այս տարի երգչախմբի լսումներին հրավիրված էին եվրոպացի երգիչներ։ Հեբեր Ֆերազ-Լեյտեն կլինի ավստրիացի առաջին համաշխարհային մասնակիցը, որը երգելու է երգչախմբի հետ Հիսուս Քրիստոսի Վերջին Օրերի Սրբերի Եկեղեցու գերագույն համաժողովում՝ 2024 թվականի ապրիլի 6-7-ին:
«Չեմ կարող ասել, որ սա իրականացված երազանք է,- ասաց Հեբերը,- որովհետև երբեք չէի երազել երգել Թաբերնաքլ երգչախմբի հետ: Դա ինձ համար անհասանելի մի բան էր»։
Մրցանակակիր Թաբերնաքլ երգչախումբը աշխարհի ամենահին և ամենամեծ երգչախմբերից է: Երգչախումբը ելույթ է ունեցել ավելի քան 28 երկրների հանդիսատեսի առջև և վաճառել միլիոնավոր ձայնագրություններ:
Հեբերը ծնվել է Ուրուգվայում, ապա իր ընտանիքի հետ ներգաղթել է Ավստրիա՝ նախքան կդառնար տասներկու տարեկան: Նրա հայրը նյարդավիրաբույժ է և ընդունել էր աշխատանքի առաջարկը Վիեննայում։ «Ծրագրել էինք մնալ մեկ կամ երկու տարի, բայց նրա պայմանագիրը երկարաձգեցին, և մենք մնացինք ընդմիշտ», - ժպտալով ասում է Հեբերը: «Այսպիսով, ես, անշուշտ, այժմ ավելի շատ ավստրիացի եմ, քան ուրուգվայցի: Դահուկասաքի հանդեպ իմ սերը դրա ապացույցն է»։
Հեբերը մեծացել է որպես Հիսուս Քրիստոսի Վերջին Օրերի Սրբերի Եկեղեցու ակտիվ անդամ: Հյուսիսային Իսպանիայում Եկեղեցու լիաժամկետ միսիայում ծառայելուց հետո Հեբերը վերադարձավ Վիեննա՝ սալսա պարելու իր սիրո մղումով: Այդպես նա հանդիպեց իր կնոջը, որը ծնվել և մեծացել է Պերուում, բայց ունի ավստրիացի նախնիներ: Այժմ նրանք ապրում են Վիեննայի արվարձանում, որտեղ Հեբերն աշխատում է որպես ՏՏ ոլորտի վերլուծաբան, նախագծում է համակարգեր, որոնք բարելավում են բարդ բիզնես գործընթացները: Նրանք վայելում են իրենց չորս չափահաս զավակների և բազմաթիվ ընկերների ընկերակցությունը։
Երբ Հեբերը վեց տարեկան էր, նա սկսեց հաճախել դաշնամուրի դասերի և որոշ չափով սովորեց երաժշտության տեսության հիմունքները: Հեբերի պատանեկության տարիներին նրա մայրը ծառայում էր որպես ծխի դաշնակահարուհի և պարապում էր տանը: Նա խնդրում էր որդուն երգել օրհներգերը, մինչ ինքը նվագում էր, որպեսզի կարողանար կիրառել տեմպը: Կարճ ժամանակ անց, յուրաքանչյուր նոր հատվածի հետ, Հեբերը սկսեց երգել տարբեր վոկալ մասեր: Այսպիսով, մինչ մայրն ամրապնդում էր իր դաշնամուրային հմտությունները, նա սովորեց, թե ինչպես ներդաշնակել և պարզեց, որ լավ երաժշտական լսողություն ունի:
«Երբ ես 16 տարեկան էի, հորս հետ տեսա «Ամադեուս» ֆիլմը և բացահայտեցի, որ սիրում եմ դասական երաժշտություն», - ասում է Հեբերը: «Ես շատ եմ սիրում օպերա և օրատորիաներ»: Հեբերը միշտ երգել է եկեղեցական երգչախմբերում, սակայն պաշտոնական վոկալ կրթություն չի ստացել: «Ես իսկապես ինձ երաժիշտ չեմ համարում, բայց սիրում եմ երաժշտությունը»: Իսպանիայում նրա միսիայի ղեկավարներըերկուսն էլ եղել են Թաբերնաքլ երգչախմբի նախկին երգիչներ, ուստի երաժշտությունը նրա միսիայի փորձառության կարևոր մասն էր: «Յուրաքանչյուր միսիոներական համաժողով նման էր երգչախմբային փորձի»,- հիշում է նա:
Եվրոպայի Կենտրոնական Տարածաշրջանի նախագահությունը առաջարկեց նրա թեկնածությունը, որից հետո Հեբերը էլ-նամակ ստացավ Թաբերնաքլ երգչախմբից, որով նրան հրավիրում էին լսումների: Գործընթացը տևեց մոտ տասը շաբաթ՝ սկսվելով առցանց հարցազրույցից՝ գործնական մանրամասները լուսաբանելու համար: Հաջորդեցին տեխնիկական լսումները։ Նա մոտ մեկ ամիս ժամանակ ուներ՝ ձայնագրելու իր ձայնային կատարումները տարբեր եղանակներով: Ուստի օգնության կարիք ուներ։ Ընտանիքի ընկերը, որը օպերային երգիչ է Իսպանիայում, նրան տվեց ձայնի առաջին առցանց դասերը՝ շաբաթը երկու անգամ: «Դուք չորս շաբաթ ունեք ինձ հաջորդ Պավարոտտիի վերածելու համար», - ասաց Հեբերը նրան: Նա ձայնագրությունները ներկայացրեց Սոլթ Լեյք Սիթիում գտնվող վերանայման հանձնաժողովին և ակնկալվում էր, որ դրանք ամբողջությամբ կմերժվեին:
Սակայն նրան չմերժեցին և նա անցավ եզրափակիչ փուլ՝ Թաբերնաքլ երգչախմբի դիրիժորի օգնական Ռայան Մերֆիի հետ 15 րոպե տևողությամբ առցանց լսումներից հետո: «Ես շատ նյարդայնացած էի»,- ասում է Հեբերը: «Իմ համակարգիչն ու խոսափողը տեղադրել էի տան լավագույն տեղում, որ կարողացել էի գտնել, իսկ կնոջս ու երեխաներիս ուղարկեցի մյուս սենյակ»: Լսումները լավ սկսվեցին, բայց աստիճանաբար դժվարացան, և Հեբերը մտածեց. «Ոչ, ես բավականաչափ լավը չեմ»: Նա շատ լավ ավարտեց, բայց կրկին համոզված էր, որ չի ընտրվելու:
Նրա 16-ամյա դուստրն ասաց նրան. «Հայրիկ, հիշիր, սա պարզապես երգչախումբ չէ: Սա կոչում է, և, հետևաբար, եթե Երկնային Հայրը ցանկանում է, որ դու այնտեղ լինես, նա այնպես կանի, որ դու այնտեղ կլինես»: Հեբերը հուզված էր նրա խորաթափանցությունից: Մի քանի շաբաթ անց՝ վաղ առավոտյան նա էլ-նամակ ստացավ՝ բարի լուրով: «Ես ուզում էի ուրախությունից բացականչել, բայց տանը բոլորը քնած էին, ուստի լուռ մնացի», - ասում է Հեբերը:
Հեբերը մի քանի շաբաթ կունենա՝ սովորելու 11 երաժշտական ստեղծագործությունները, որոնք նա կկատարի Թաբերնաքլ երգչախմբի հետ: Երբ համաժողովից երկու շաբաթ առաջ նա ժամանի Սոլթ Լեյք Սիթի, կնշանակվի որպես երաժշտական միսիոներ և իր ամբողջ ժամանակը կանցկացնի՝ պատրաստվելով ելույթներին: «Ես չեմ գնում այնտեղ, որպեսզի այցելեմ ընտանիքին և ընկերներին, այլ գնում եմ մի հատուկ հանձնարարությամբ, և դա այն է, ինչին ես նվիրելու եմ իմ ամբողջ ժամանակը», - ասում է Հեբերը:
Հեբերը կլինի Թաբերնաքլ երգչախմբի պաշտոնական անդամը հինգ տարի ժամկետով և հնարավորություն կունենա երգելու Եկեղեցու առնվազն երեք տարբեր գերագույն hամաժողովներում: Առաջին համաշխարհային մասնակիցները երգչախմբի հետ ելույթ ունեցան 2023 թվականի ապրիլին, և այս տարի առաջին անգամ լսումների էին հրավիրվել Եվրոպայից ժամանած երգիչներ։ 2024 թվականի ապրիլին կայանալիք գերագույն hամաժողովում կլինեն տասներկու համաշխարհային մասնակիցներ, որոնցից յոթը Եվրոպայից են՝ Ֆրանսիայից, Ավստրիայից, Շվեդիայից, Դանիայից և Անգլիայից:
Անցած գերագույն համաժողովների տեսահոլովակը Հեբերն արդեն ցույց է տվել իր սալսա պարային խմբին և հրավիրել է նրանց դիտելու համաժողովը ապրիլին, որպեսզի տեսնեն իրեն երգչախմբում:
«Սա, անկասկած, լավագույն երգչախումբն է, որտեղ ես երբևէ երգել եմ և հավանաբար կերգեմ իմ ողջ կյանքում»,- ասում է Հեբերը: «Դա Տիրոջ քնքուշ ողորմությունն է։ Ինձ չեն ընտրել նրա համար, որ ես լավագույն երաժիշտն եմ ամբողջ Եվրոպայի Կենտրոնական Տարածաշրջանում: Դա, իհարկե, այդպես չէ: Ես զգում եմ, որ սա մի միջոց է, որով Տերն ինձ ասում է, որ Նա տեսնում է ինձ և ցանկանում է ինձ տալ այս փորձառությունը, ասելով՝ վայելի՛ր այն հիմա»։
Հիսուս Քրիստոսի Վերջին Օրերի Սրբերի Եկեղեցու գերագույն համաժողովները տեղի են ունենում ամեն տարի երկու անգամ՝ ապրիլին և հոկտեմբերին: