Էսթերն ապրում է Ֆրանսիայի հարավ-արևմուտքում գտնվող Բորդո քաղաքում։ Կլեմենն ապրում է Ֆրանսիայի հյուսիս-արևելքում՝ Ռեյմսում: Նրանց այժմ միավորում է մի անսպասելի, նոր կապ, քանի որ երկուսն էլ ընտրվել են որպես համաշխարհային մասնակիցներ The Tabernacle Choir at Temple Square ԱՄՆ Յուտա նահանգում: Նրանք երգելու են երգչախմբի հետ՝ Հիսուս Քրիստոսի Վերջին Օրերի Սրբերի Եկեղեցու համաշխարհային գերագույն համաժողովի ժամանակ, 2024թ. ապրիլի 6-7-ին:
Մրցանակակիր «Թաբերնաքլ» երգչախումբը աշխարհի ամենահին և ամենամեծ երգչախմբերից է: Երգչախումբը ելույթ է ունեցել ավելի քան 28 երկրների հանդիսատեսի առջև և վաճառել միլիոնավոր ձայնագրություններ:
Ստրասբուրգում ծնված Էսթեր Փեթիոնը երաժշտական ընտանիքում մեծացած տասը երեխաներից իններորդն է: Բոլոր երեխաներն իրենց պատանեկության տարիներին սովորել են երգել և որևէ գործիք նվագել, այդ թվում՝ էսթերը, որը հետագայում երգելը դարձրեց իր մասնագիտությունը: Յոթ տարեկանում Էսթերը ոգևորված սկսեց սովորել Ստրասբուրգի երաժշտական կոնսերվատորիայում: Նա սովորում էր պարզ երաժշտության տեսություն և երգում էր մանկական երգչախմբում։ Դաշնամուրի հիմնական հմտությունները նրան ուսուցանել է մայրը, իսկ ինը տարեկանում նա թավջութակը ավելացրել է իր երգացանկին:
Էսթերն այժմ ապրում է Բորդոյում և աշխատում է որպես լոգոպեդ՝ օգնելով երեխաներին և մեծահասակներին: Նա նաև օգտագործում է ամեն առիթ՝ երգելու համար։ «Ես պրոֆեսիոնալ չեմ,- ասում է Էսթերը,- բայց ես միշտ սիրել եմ երգել հաճույքի համար և արտահայտել իմ ուրախությունը»։ Նա կարողացավ երգել կոնսերվատորիայի և եկեղեցու բազմաթիվ երգչախմբերում: Ինչպես իր մայրը և քույրերի մեծ մասը, Էսթերը բարձր սոպրանո է: «Թաբերնաքլ երգչախմբի հետ երգելը կլինի անհավատալի երաժշտական փորձառություն և իմ ձայնը Տիրոջը տալու հնարավորություն»,- ասում է նա:
Էսթերը կմեկնի Սոլթ Լեյք Սիթի Կլեման Ժոուի՝ բաս-բարիտոնի հետ, որը ծնվել է Բորդոյում, բայց այժմ իր կնոջ և փոքր դստեր հետ ապրում է Ռեյմսում: Կլեմենը օդային երթևեկության վերահսկիչ է, սիրողական հրուշակագործ և լուրջ երաժիշտ: Նա պրոֆեսիոնալ երգիչ չէ, բայց շատ մոտ է դրան:
Կլեմենի հայրական տանը միշտ երաժշտություն էր հնչում, որտեղ նա հինգ տարեկանում սկսեց դաշնամուրի դասեր անցնել: Նրա ծնողները տաղանդի վաղ նշաններ նկատեցին Կլեմենի մեջ և թույլ չէին տալիս, որ նա դադարեցնի դասերը, երբ նա գայթակղվում էր այդպես վարվել: Նա գնահատում է ծնողների աջակցությունն ու համբերությունը դաշնամուրի իր շարունակական ուսումնառության մեջ: Ավագ դպրոցի բոլոր տարիներին նա դաշնամուրով նվագակցում էր երգիչներին և ակտիվ էր իր տեղական համայնքի երգչախմբում, որը ղեկավարում էր պրոֆեսիոնալ երաժիշտ։
Երբ տասը տարի առաջ Կլեմենը ընտանիքի հետ տեղափոխվեց Ռեյմս՝ շարունակելու իր կարիերան օդային երթևեկության ոլորտում, նրա երաժշտական կյանքը շրջադարձ կատարեց, և նա լսումներ անցավ Ռեյմսի կոնսերվատորիայում, բայց ոչ թե դաշնամուրի, այլ օպերային երգեցողության ոլորտում: «Այդ ժամանակ սկսվեց իսկական երգեցողության հաղթարշավը»,- նշում է Կլեմենը: Բարձրակարգ դասախոսների և օպերային երգիչների օգնությամբ նա կարողացավ մասնակցել պրոֆեսիոնալ բեմադրությունների, այդ թվում՝ Մոցարտի «Կախարդական ֆլեյտա» օպերային։
«Միշտ իմ երազանքն է եղել երգել Թաբերնաքլի երգչախմբի հետ: Ինչ-որ պահի ես նույնիսկ մտածում էի Յուտա տեղափոխվելու, Սոլթ Լեյք Սիթիի օդանավակայանում աշխատելու, Բրիգամ Յանգ համալսարանում երաժշտություն սովորելու և երգչախմբի լսումների մասին, բայց չստացվեց»,- ասում է Կլեմենը: «Ես ցնցված էի, երբ իմացա այս ծրագրի մասին»:
Երբ եվրոպայի Կենտրոնական Տարածաշրջանի Նախագահությունը առաջարկեց նրանց թեկնածությունը, և՛ Էսթերը, և՛ Կլեմենը էլ-նամակներ ստացան Թաբերնաքլ երգչախմբից, որով նրանց հրավիրում էին լսումների: Գործընթացը տևեց մոտ տասը շաբաթ՝ սկսվելով առցանց հարցազրույցից՝ գործնական մանրամասները լուսաբանելու համար: Հաջորդեցին տեխնիկական լսումները։ Նրանք մոտ մեկ ամիս ժամանակ ունեին՝ ձայնագրելու իրենց ձայնային կատարումները տարբեր եղանակներով, այնուհետև ձայնագրությունները հանձնեցին ստուգող հանձնաժողովին։
Նրանցից յուրաքանչյուրին ամենից շատ նյարդայնացնում էր 15 րոպե տևողությամբ առցանց լսումները Թաբերնաքլ երգչախմբի դիրիժորի օգնական Ռայան Մերֆիի հետ: «Նա շատ հաճելի մարդ է, շատ պրոֆեսիոնալ, և խոսում է ֆրանսերեն»,- ասում են նրանք երկուսն էլ: Մի քանի շաբաթ անց նրանց էլեկտրոնային փոստով տեղեկացրին վերջնական որոշման մասին:
Կլեմենը ասում է. «Մի առավոտ ես ձեռքս հեռացրի հեռախոսիս զարթուցիչից և այնտեղ տեսա մի քանի նամակ: Երգչախմբից մի նամակ կար, որը սկսվում էր՝ «Շնորհավորում ենք» բառերով: Ուստի, ես արթնացրի կնոջս և ասացի. «Ես դա արեցի»:
«Երբ տեսա էլ-նամակը, սիրտս լցվեց հույզերով»,- հիշում է Էսթերը: «Ես զարմացած էի, ուրախ, հետաքրքրված և անհանգիստ՝ մնացած հաղթարշավի համար և իսկապես ոգևորված էի: Հիմնականում ես շատ շնորհակալ էի իմ Երկնային Հորը»:
Էսթերն ու Կլեմենը մի քանի շաբաթ կունենան սովորելու 11 երաժշտական ստեղծագործությունները, որոնք նրանք կկատարեն Թաբերնաքլ երգչախմբի հետ: Երբ համաժողովից երկու շաբաթ առաջ նրանք ժամանեն Սոլթ Լեյք Սիթի, կնշանակվեն որպես երաժշտական միսիոներներ և իրենց ամբողջ ժամանակը կանցկացնեն՝ պատրաստվելով ելույթներին: Նրանք երկուսն էլ հատկապես երախտապարտ են միսիոներներ կանչվելու հնարավորության համար: «Սա ինձ համար շատ բան է նշանակում, քանի որ ես երբևէ չեմ ծառայել որպես միսիոներ»,- ասում է Էսթերը: «Այսպիսով, սա այժմ իմ միսիան է՝ ինձ հարմար, անձնավորված ձևով: Կարծում եմ, որ Երկնային Հայրը հատուկ միջոց ունի բոլորի համար, որ լինեն Իր Որդու և Իր ողորմության վկաները»:
Ֆրանսիայից ժամանած այս երկու երգիչները հինգ տարի ժամկետով կլինեն Թաբերնաքլի երգչախմբի պաշտոնական անդամները՝ հնարավորություն ունենալով երգել Եկեղեցու առնվազն երեք տարբեր գերագույն համաժողովներում: Առաջին համաշխարհային մասնակիցները երգչախմբի հետ ելույթ ունեցան 2023 թվականի ապրիլին, և այս տարի առաջին անգամ լսումների էին հրավիրվել Եվրոպայից ժամանած երգիչներ։ 2024 թվականի ապրիլին կայանալիք գերագույն hամաժողովում կլինեն տասներկու համաշխարհային մասնակիցներ, որոնցից յոթը Եվրոպայից են՝ Ֆրանսիայից, Ավստրիայից, Շվեդիայից, Դանիայից և Անգլիայից:
«Կարծում եմ, որ կոնսերվատորիայի իմ ընկերներից շատերը կդիտեն համաժողովի նիստերը, որպեսզի փորձեն ինձ տեսնել»,- ասՈՒՄ Է Կլեմենը: «Նրանք օգնեցին և քաջալերեցին ինձ լսումների ընթացքում, ուստի ես ուրախ եմ, որ նրանք կարող են կիսվել ինձ հետ այս փորձառությամբ»:
«Առաջին անգամն է, որ ես կհայտնվեմ այդքան շատ մարդկանց առջև, ինչը սկզբում վախեցնող է թվում»,_ ասում է Էսթերը: «Բայց ես գիտեմ, որ Երկնային Հայրը կօգնի ինձ իմանալ, թե ինչպես արձագանքել, որպեսզի լավ միսիոներ լինեմ՝ որպես Թաբերնաքլի երգչախմբի մաս»:
Հիսուս Քրիստոսի Վերջին Օրերի Սրբերի Եկեղեցու գերագույն համաժողովները տեղի են ունենում ամեն տարի երկու անգամ՝ ապրիլին և հոկտեմբերին: