Ակնկալվում է, որ մինչև հազար չափահաս երիտասարդներ (Հիսուս Քրիստոսի Վերջին Օրերի Սրբերի Եկեղեցու անդամներ) ամբողջ Եվրոպայից կօգնեն անցկացնել 2023 թվականի Հատուկ օլիմպիական համաշխարհային խաղերի միջոցառումները Բեռլինում: Եկեղեցին հովանավորում է նրանց Եվրոպայի չափահաս երիտասարդների ծառայության համաժողովի ժամանակ: Խաղերը և ծառայության համաժողովը կանցկացվեն 2023 թվականի հունիսի 16-25-ը։
Եվրոպայում ապրող չափահաս երիտասարդներին ուղղված վերջին նամակում Եկեղեցու Եվրոպայի Կենտրոնական Տարածաշրջանի ղեկավարները նշել են. «Մեր աստվածային հնարավորություններից և պարտականություններից մեկն է հետևել մեր Փրկիչ Հիսուս Քրիստոսին՝ ծառայելով մեր մերձավորներին: Այս համաժողովը անմոռանալի հնարավորություն կտա ծառայելու և մեծարելու մեր Երկնային Հոր հրաշալի զավակներից մի քանիսին, որոնք հաճախ անտեսված են»:
Բեռլինի քսանհինգամյա բնակիչ Տաբիտա Ավերսան մեկն էր գերմանացի 35 չափահաս երիտասարդներից, որը կամավոր մասնակցեց անցած հունիսին Բեռլինում անցկացված Գերմանիայի Հատուկ օլիմպիական ազգային խաղերին: Այդ փորձառությունը նա նկարագրեց որպես՝ «Արդյունավե՛տ: Իմ հիշողության մեջ հատկապես մնացել է չորեքշաբթի երեկոյան հավաքույթը, որը կազմակերպեցինք կամավորների և մարզիկների համար, և մենք կարողացանք պարզապես պարել և զվարճանալ միասին»: Նա հայտնում է, որ որպես կամավոր արդեն գրանցվել է 2023 թվականի Հատուկ օլիմպիական համաշխարհային խաղերի համար:
Այս կամավորական ծառայությունը պահանջում է թե՛ ժամանակի, թե՛ գումարի զոհաբերություն 18-35 տարեկան երիտասարդներից, որոնք զբաղված են դպրոցով, աշխատանքով, հարաբերություններ կառուցելով և ապրուստ վաստակելով։ Մասնակիցները ճամփորդելու են Բեռլին և վերադառնալու են իրենց հաշվին: Նրանք այնտեղ կստանան կացարան, սնունդ, վերապատրաստում Հատուկ օլիմպիական խաղերի կողմից և խաղերին պետք է ծառայեն հինգ օր, իսկ ցանկության դեպքում՝ նաև տասը օր: Ցերեկային ժամերին նրանք կծառայեն որպես կամավորներ Հատուկ օլիմպիական խաղերի ժամանակ, իսկ երեկոյան կկարողանան մասնակցել եկեղեցու կողմից կազմակերպվող միջոցառումներին՝ ներառյալ պարեր, հոգևոր հավաքներ, սեմինարներ, քննարկումներ և հետագա շփումներ:
«Այլ հավատքների կամ որևէ հավատքի չդավանող երիտասարդներին նույնպես խրախուսում ենք միանալ այս յուրահատուկ ծառայողական համաժողովին», - ասում են Եկեղեցու Կենտրոնական Եվրոպայի Տարածաշրջանի ղեկավարները: Բոլոր կամավորները պետք է խոսեն կա՛մ գերմաներեն, կա՛մ անգլերեն, և նրանց խնդրվում է համաժողովի ընթացքում հավատարիմ մնալ Եկեղեցու վարքագծի չափանիշներին: Բոլոր լրացուցիչ տեղեկությունների համար, ներառյալ ծառայության համաժողովին մասնակցելու և Հատուկ օլիմպիական խաղերում կամավոր գրանցվելու համար սեղմեք այստեղ:
«Պարզապես արե՛ք դա», - ասում է Ավերսան։ «Դա այնքան արդյունավետ կլինի, դուք կճանաչեք մի քանի զարմանալի մարդկանց ու կծանոթանաք նրանց պատմությանը: Փորձառությունն ու հիշողությունները, որոնք դուք ձեռք եք բերում, դուք կհիշեք ամբողջ կյանքում»:
Իրենց վերջին նամակում Հիսուս Քրիստոսի Եկեղեցու Եվրոպայի Կենտրոնական Տարածաշրջանի ղեկավարները հավելում են. «Մենք ոգևորված ենք, քանի որ ամբողջ Եվրոպայում մեր չափահաս երիտասարդները կմիանան ծառայության և բարեկամության այս հրաշալի հավաքին: Երբ մենք հետևում ենք սիրով և միասնաբար ծառայելու Հիսուս Քրիստոսի օրինակին, մենք գիտենք, որ դա օրհնություն կդառնա բոլոր ներգրավվածների համար»:
Հատուկ օլիմպիական համաշխարհային խաղերը ներառական սպորտի ամենախոշոր միջոցառումն է, որտեղ մտավոր հաշմանդամություն ունեցող 7000 մարզիկներ միասին մրցում են 26 մարզաձևերում։ Ամբողջ աշխարհից օգնության են կանչված մինչև 20000 կամավորներ։