Երեց Կոսեն Աստծո արարչագործությունների հանդեպ հոգատարությունը անվանում է «սիրո արտահայտություն »

Երեց Ջեռալդ Կոսեն ուրբաթ օրը ասաց, որ երկրի և Աստծո զավակների պահպանումն ու նրանց հանդեպ հոգատարությունը «մեր Արարչի հանդեպ սիրո արտահայտություն է և Նրա հանդեպ մեր անկեղծ երախտագիտության արտացոլում»։

Հիսուս Քրիստոսի Վերջին Օրերի Սրբերի Եկեղեցու Տասներկու Առաքյալների Քվորումի նորագույն անդամը Պրովոյի (Յուտա) Բրիգամ Յանգ համալսարանի ուսանողական ավանից խոսեց Աստծո արարչագործությունների նկատմամբ հոգատարության մասին՝ երկու առանձին համաժողովներում հավաքված հարյուրավոր մարդկանց առջև․ մեկը՝ շրջակա միջավայրի պահպանության, մյուսը՝ կարիքավորների հանդեպ հոգ տանելու պատասխանատվության մասին։

Երեց Կոսեի հրավերը ներկաներին պարզ էր։ «Սա գործելու հրավեր է»,- ասաց Ֆրանսիայի Բորդո քաղաքում ծնված առաքյալը։ «Որպես Հիսուս Քրիստոսի աշակերտներ, մենք սրբազան պարտականություն ունենք Աստծո սիրո բոցը վառ պահել մեր սրտերում և թույլ տալ, որ այդ լույսը փայլի մեր համայնքներում։ Տերը մեզ կոչ է անում ճանաչել մեր շուրջը գտնվող ավելի լայնարձակ աշխարհը՝ մի բան, որը մեր փոխկապակցված դարում առավել հնարավոր է, միաժամանակ մնալով ամուր և ակտիվորեն ներգրավված այն վայրերում, որտեղ ապրում և ծառայում ենք»։

Նա խոսեց Եկեղեցու՝ շրջակա միջավայրի կայունության որոշ առաջնահերթությունների մասին: Օրինակ՝ վերականգնվող էներգիայի ոլորտում այն ​​ունի ավելի քան 800 օբյեկտ, որոնք տեղում արտադրում են արևային էներգիա: Այդ նախագծերը գործում են 45 երկրներում, և առնվազն 100 այլ նախագծեր հաստատվել են շինարարության համար: Նա նաև նշեց, որ Հավայան կղզիների ԲՅՀ-ն գրեթե ավարտել է արևային միկրոցանցի կառուցումը, որը կմատակարարի ամբողջ համալսարանական համալիրը, մոտակա Լայե տաճարը և Պոլինեզյան մշակութային կենտրոնը:

Բացի թափոնների կրճատումից և սուրբ տասանորդի ֆոնդերի խնայողությունից՝ վերականգնվող էներգիայի վրա այս կենտրոնացումը բարելավում է կրթության և առողջ ապրելակերպի հասանելիությունը շատ մարդկանց համար, ասաց առաքյալը։

«Օրինակ՝ շատ զարգացող երկրներում Եկեղեցու կողմից արևային էներգիայի աճող օգտագործումը՝ զուգորդված պահեստային մարտկոցների և արբանյակային ինտերնետի հետ, թույլ է տալիս, որ մեր հավաքատները շաբաթվա ընթացքում վերածվեն վիրտուալ դասարանների»,- ասաց նա։ «BYU–Pathway-ը, որի ուսանողների թիվը, ինչպես կանխատեսվում է, այս տարի կհասնի 100,000, արագ զարգանում է մասամբ այս տեխնոլոգիայի շնորհիվ, ինչպես նաև ինքնապահովման դասընթացների շնորհիվ, որոնք ուսուցանում են ֆինանսական գրագիտություն, նոր բիզնեսների հիմնում, առողջ ապրելակերպ և ճիշտ սննդակարգ»։

Երեց Կոսեն նաև նշեց Եկեղեցու ուշադրության կենտրոնացումը նյութերի կորուստներից խուսափելու վրա։ Սոլթ Լեյք Սիթիի գլխավոր տպագրական կենտրոնում իրականացվող լայնածավալ թղթի վերամշակման աշխատանքներից բացի, Եկեղեցին ղեկավարում է տասնյակ Deseret Industries բարեգործական խանութներ, որտեղ նվիրաբերված իրերի վերամշակումը և վաճառքը ստեղծում են աշխատանքի վերապատրաստման հնարավորություններ հազարավոր մարդկանց համար, որոնք բախվում են աշխատանքի ընդունման խոչընդոտների։

Բացի այդ, ԱՄՆ-ում և Կանադայում Եկեղեցու բոլոր էլեկտրոնային թափոնները հեռացվում են աղբավայրերից և նվիրաբերվում, կամ ապամոնտաժվում ու վերամշակվում։

«Նա հավելեց. «Իրականում շատ օգտագործված համակարգիչներ հասնում են BYU–Pathway ծրագրի ուսանողների տները Աֆրիկայում՝ օգնելով վերացնել կրթություն ստանալու խոչընդոտները»։ Առաքյալը նաև խոսեց Եկեղեցու՝ ջրի պահպանման ջանքերի մասին։

«Այսպիսի նախաձեռնության օրինակ է այս տարվա սկզբին արված հայտարարությունը, ըստ որի Եկեղեցին նախատեսում է տեղադրել խելացի կառավարման համակարգեր ավելի քան 3,000 հավաքատներում՝ ԱՄՆ արևմտյան մասում գտնվող «ռահվիրաների միջանցքում», ներառյալ Այդահո, Յուտա, Արիզոնա նահանգները և Նևադայի, Վայոմինգի ու Մոնտանայի որոշ հատվածների։ Եկեղեցին արագացնում է այս համակարգերի տեղադրումը և նախատեսվում է, որ մինչև տարվա ավարտը կտեղադրվի մոտ 1,800-ը»։

Նա նաև նշեց Եկեղեցու ջանքերը՝ ուղղված Great Salt Lake լճի պահպանությանը։ Սեպտեմբերին Եկեղեցին հայտարարեց ևս մեկ գործարքի մասին՝ Great Salt Lake Watershed Enhancement Trust-ի հետ, որը լճին ավելի շատ ջուր կհասցնի՝ տարեկան մինչև 7,400 ակր-ոտնաչափ ջրի 10-ամյա վարձակալության պայմանագրով։

«Երախտապարտ ենք այն անխոնջ ջանքերի համար, որոնք գործադրում են շատ մարդիկ՝ իրենց հմտությունները, տաղանդները, հնարամտությունը, ստեղծագործականությունը և այլ միջոցներ կիրառելով՝ նման բարդ խնդիրը լուծելու համար, ներառյալ այստեղ՝ BYU-ում գտնվողները և Եկեղեցու մյուս աշխատակիցները»,- ասաց երեց Կոսեն»։ «Մենք գիտակցում Great Salt Lake-ի ապագայի շուրջ առկա բազմաթիվ բարդությունները և պատրաստ ենք լինել լուծման մի մասը՝ համագործակցելով մեր բազմազան համայնքային շահառուների հետ»։

Ջրի խնայողությունից բացի, Եկեղեցին կենտրոնանում է մարդկանց՝ մաքուր ջրի հասանելիության ապահովման վրա։ Օրինակ՝ Կիրիբատիում, 2022 թվականից սկսած, Եկեղեցին և իր մարդասիրական գործընկերները կառուցել են հինգ արևային էներգիայով աշխատող աղազերծման կայաններ, որոնք ապահովում են կայուն ջրամատակարարման համակարգեր մոտ 6,000 բնակչի համար՝ նպաստելով մանկական մահացության նվազեցմանը։

«Տարածաշրջանի ղեկավարությունը մտադիր է կառուցել ևս 10-ը՝ երկրի տարածքում»,– ասաց երեց Կոսեն։ «Սա իսկապես կյանք փրկող աշխատանք է»։

Շաբաթներ առաջ ծրագրված ելույթը առաջին անգամը չէր, որ երեց Կոսեն կամ նրա Բարձրագույն իշխանություն և Բարձրագույն պաշտոնյա գործընկերները խոսում էին այս կարևոր թեմայի շուրջ։

Օրինակ՝ 2023 թվականին երեց Կոսեն և Առաջին Նախագահությունից Դ. Թոդ Քրիստոֆերսոնը Բրազիլիայում կայացած համաժողովում խոսեցին երկրի մասին հոգ տանելու վերաբերյալ։

«Մեր երկրային տնտեսության բոլոր ոլորտներում Աստծո հանդեպ մեր սերը և Հիսուս Քրիստոսի աշակերտությունը կլինեն անսասան ուղեցույց, և անկասկած, մենք իրական բարիք կգործենք աշխարհում»,- ասաց երեց Քրիստոֆերսոնը: Նա նաև ուսուցանեց, որ «մենք պետք է օգտագործենք մեր երկրային օրհնությունները՝ ուրիշների աշխարհիկ և հոգևոր կարիքները սպասավորելու համար այնպես, որ նրանք կարողանան ճանաչել և ծառայել Աստծուն և, ի վերջո, ժառանգել հավերժական կյանքը»:

Նույն տարվա վերջում՝ Աբու Դաբիում Տասներկու Առաքյալների Քվորումից երեց Պատրիկ Քիրոնն ասաց, որ երկրի մասին հոգ տանելու խնդիրը պահանջում է, որ յուրաքանչյուր ոք կատարի իր բաժինը։

«Միասնական ջանքերը, որտեղ կառավարությունները, հավատքի և համայնքի առաջնորդները, լրատվամիջոցները, արդյունաբերությունը, գիտնականները և ընտանիքները համատեղ աշխատում են, երկիրը և մարդկային ընտանիքը վերակենդանացնելու ազնիվ նպատակին հասնելու միջոցն են։ Թող որ մենք սա ընդունենք որպես սրբազան պարտականություն»,- ասաց երեց Քիրոնը։

Այս տարվա սկզբին Սփոփող միության գերագույն նախագահ Քամիլ Ն. Ջոնսոնը աշխարհի չափահաս երիտասարդներին ուսուցանեց «ճանաչել կապը երկրի և մեր մերձավորի մասին հոգ տանելու միջև: Երկրի մասին հոգ տանելով, մեր տեղական միջավայրը գեղեցկացնելով և մեր համայնքներն ավելի կայուն դարձնելուն օգնելով՝ մենք գործում ենք որպես երկրի իմաստուն տնտեսներ՝ մեր հարևանների կյանքը օրհնելու համար»:

Ուրբաթ օրը ԲՅՀ-ում իր ելույթն ավարտելիս երեց Կոսեն ուսուցանեց, որ Քրիստոսի աշակերտները «կոչված են պատվելու և հոգ տանելու Նրա արարչագործությունների մասին, օրհնելու մեր ընտանիքները, ամրացնելու մեր համայնքները և սիրով բարձրացնելու մեր շրջապատի մարդկանց»։

«Ես վկայում եմ, որ Աստված և Նրա Որդին՝ Հիսուս Քրիստոսը, ապրում և սիրում են մեզ կատարելապես,- ասաց նա։ «Նրանք ստեղծեցին այս երկիրը որպես աստվածային ծրագրի մաս՝ մեզ հավերժ օրհնելու համար։ Երբ մենք հետևենք Նրանց և հավատարմորեն ծառայենք, կգտնենք իսկական և հավիտենական ուրախություն»։

Կարդացեք երեց Կոսեի ամբողջական ելույթը․ «Հոգատարություն Աստծո արարչագործությունների հանդեպ»։

Ավելին իմանալու համար այցելեք Շրջակա միջավայրի կայունությունը Եկեղեցու գործունեության մեջ։